Hoi zäme. Mi hi dr rund 3-stündig Abstieg vom 1086m höche Snowdon gschafft u mache is itz a gmüetlecha Abe im Zümmer. Mi hi insofärn nid Glück ghäbe, dass de Gipfu di ganz Zyt i de Wulke/Näbu isch gsi. Aber scho chly witer une simer unet de Wulke gsi u vo det us het mu superschöni Abstiegs-Sicht gha. U gränet hets di ganz Zyt nüd. Aber d Brite si scho nid ganz normau (di meischte wo ufe Snowdon gö si Brite). Da hi si hie im Gebiet x Bärge über 800m u jede, würkli jede louft ufe Snowdon. Soviu Lüt uf eim Huufe e Bärg ufe u abe loufe hani z einzig mau bis itz am Gurtefestival gseh... Mir wo ds Bähnli wui gno hi si eher d Usnahm gsi. Äntwäder ma luuft wui u ai oder nimt beidi mau z Bähnli. Bähnli nä isch sowieso kompliziert. As si nume so chlyni Züg, i jedem Zug hi nume 56 Lüt Platz. As fahrt nume au haub Stun a Zug. We mu nid as Billet vorreserviert het, chamus eh vergässe a Platz z übercho. We mu nai dobe isch u umi z Bähnli nimmt für ai, het mu grad mau a haub Stun Zyt dobe, für as Kafi z näh oder churz ufe Gipfu wui z hetze. Nai fahrt z Bähnli umi ai. Das mues mu o näh, wenn nid muess mu ai luufe wüu mu süsch ki Platz me het im Bähnli... Wi o ging, für üs hets gstumme. Dobe hets as härzigs TakeAway Kafi am Schärm ghäbe (ohni Terrassa oder so). Wo mer am Käfele si gsi, isch no grad de Füüralarm los u si hi z Kafi müesse evakuiere... Aber as isch du Fehlalarm gsi... So luschtig gsi aus zäme. Liebi Grüess