Hoi zäme. Hüt hi mer vo Caernarfon us a Abstächer uf d Insla Anglesey gmacht. Si zersch uf Roscolyn gfahre u si det ga a Küschtespaziergang mache. Da himer umi mau hordene vo Schaf gseh :-) Zudäm himer vüu Kampfflugis u -helikopter gseh, hi festgsteut dass ganz i de nöchi dr Anglesey-Stützpunkt vo de Royal Airforce isch (u we mu de Klatschheftleni cha glube isch das ja de Arbeitsort vom Prinz William...) Am Namitag simer uf Beaumaris gfahre. Unterwägs simer im Dorf mitem lengschte Name verbicho: llanfairpwllgwyngyllgogerychwyrndrobwllllantysiliogogogoch - dä Name hi si sich im 19. Jahrhundert säuber gä, um Touriste azlocke. U as funktioniert, as het sogar Care ghäbe dete für Fotostopp ;-) In Beaumaris himer z Castle vo usse agugget, hi a feini Glace gässe u si chly am Kanau entlang gloffe. Mit de Snowdonia-Bärge im Hintergrund het ds Büud a na Schwizer See erinneret. Morn geits de witer uf Colwyn Bay, üsi zweitletschti Destination. Liebi Grüess