So jetzt bini ja scho fascht e wuche da und han scho agfange mitem praktikum. hong kong gfallt mer mega, s wetter isch bis jetzt noni sooo guet gsi aber es werdi ab morn oder zistig besser. die erste taeg woni ja no frei gha han hani eifach ali sache organisiert wie zb bank account, sim charte und transport charte...denn hani no paar sache müsse kläre wegem visum wo noed ganz klar gsi sind und han drum a eim tag no müsse nach macau, praktisch us und wieder iireise. denn hani am fritig au scho agfange mitem praktikum. bis jetzt und auno morn hämmer eifach training über alles. alles übers hotel, jedes zimmer, kategorie und alles i jedes chline detail. vo welli teesorte dasses haet über welles zimmer welli sicht haet und wie mer internet hät und chan zahle aber au infos über hong kong und vips etc. also es isch seehr sehr streng und strikt und sie erwartet sehr viel!!! ich hoffe ich schaff das, die letschte taeg sind soo viel info gsi und am abig denn no alles lerne...di und mi hani denn frei und abem do hani denn spatschicht, also wirdi grad is chalte wasser gworfe...ich hoff die hend trotzdem chli toleranz und gsehnd dassi mer müeh gib au wenn vllt noed ales grad klapp....aber isch hald en sehr höche standard und logisch da chaschder noed viel erlaube und check in (was momentan d hauptufgab sii wird) isch ja sehr wichtig vor allem well im mandarin oriental werded alli gest is zimer begleitet und det iichecked, s zimmer erchlärt und so wiiter und das muss ich alles ellei choene mache, vom ganze check in prozess bis zum choene infos geh übers ganze zimmer und alles im hotel...es isch sehr spannend eifach alles echli viel aber ich wird viel lerne, hoff eifach dassi noed grad abghöklet wird am afang fallsi oepis noed chan und ich froeg hald immer oft wellis noed will falsch mache =))
sust d lüt in hong kong sind underschiedlich, schwer z erchläre ;) bim schaffe hani noni so viel kenneglernt welli ja nur im training gsi bin bis jetzt aber das chunt denn ja...sust kenni ja eifach no paar vode schuel wo au da sind woni scho troffe han...freu mi denn die vom schaffe chli kennelerne =) de ort woni wohn isch super, vode lag eifach perfekt und ich fühl mich wohl und dihei. Ja ich mach hald leider noed so fotene welli s gfuehl han ich bin ja no soo lang da aber ich poste denn no meh =) ich hoffe eu gahts guet =)