Hallo

Nochemene 20-minuetige Flog fo Maui semer guet in Ohau acho... Vom Floghafe semer metemene Shuttlebus is Hotel in Honolulu am Waikiki beach... Am Dienstag Morge hemer mol Beachpromenade onder dLuppe gnoh ond nochhem Mettag sener denn an Strand glaege... sglasklare Wasser, de fiini Sand ond stolle Waetter... Was hemer meh welle... Am Mettwoch hemer es Auto gmieted ond send om dEnsle gfahre... Woaw of dere Erkondigstour hemer extrem vell schoeni Plaetzli gseh ond au tolli Farbe (fo gruen, toerkis bes koenigsblau) vom Meer. Natuerlech hemer dete au eifach mol nor Surfer zuegluegt ond bewonderet, was die alles hend choene... Am Donnstig Morge am 9ni han ech mini erschte 2i Surflektione gha... Noch chorzer Instruktion, wie mer ufstoht ofemene Surfbrett ond wie mer legge muess bem padle esches is Wasser gange... De Surflehrer hed nor gseit: Evelyne das esch dini Waelle ond denn hani dTechnik zom Ufstoh agwaendet ond siehe da, ech ha choene stoh be minere erschte Waelle... HAMMER... Die 2h send mega schnell verbi ond inere Groppe fo 4 Persone profitiert mer halt scho sehr vell... Eis esch klar... Ergendwenn wetti wederemol surfe... Mega cools Erlaebnis gsi...

Am Friitig Morge esch am 7.25 Uhr uese Flog noch Los Angeles gsi... Bem check-in hemer Setz 37 a ond b becho... Vor ues esch ehn sehr decke Maa ghocket ond sin Setz hed oeberhaupt ned ghebt resp. well er so breit gsi esch, hed er dauernd sChnoepfli zom de Setzverstelle droeckt ond drom semer au iklemmt gsi... En Flightattendent hed den Metleid met ues gha ond hed ues anderi Setz welle gae, aber wo mer be dene acho send, send die scho bsetzt gsi... Ehre esches niened raecht gsi, dass sie ues den dFlightattendent Setz offeriert hed ond die send im Stil fo FIRST CLASS gsi...!:-)) Mer hend sehr en agnaehme flog gha...


Liebe Gruess
Steffi ond Evelyne