Obwohls am morge Gräggnät het wie üs Chüblä, si mir los i Richtig Cape Tribulation. Dä Ort wo dr Räggäwald bis ad´s Meer abechunnt. Nacherä Fährfahrt überä Daintree River si mir im Daintree NP acho. Äs isch eifach unbeschrieblich. Z´mitts im tropischä Räggäwald,und denn kilometer längi einsami wyssi Sandstränd! Und denn hei mir dä wunderschön blau Schmätterling gseh, wos da überall uf Fotos git. Riesägross, und so blau dasses scho kittschig würkt, so öpis schöns ha ig no niä gseh! Mir hei de Räggäwald-Walks gmacht, si am Beach vom Cape Tribulation gsi und hei de halt ou miterläbt wieso dä Wald, Räggäwald, heisst. Äs het immer wieder extrem gschiffät. Ufem Rückwäg zu üsem Räggäwald-Camp hei mir de ändlich mal ä Cassowary gseh wo über d´Strass gloffä isch. Uf üserä 1. Reis mit Mario hei mir mängisch wäg däm Riesevogel müessä lachä, hei aber niäh einä gseh...
Jetzt sitzä mir i üsem Camper im fischterä und losä am Meer und em Räggäwald zuä, chlei unheimlich und glich faszinierend.